Disa minuta pas orës 14:00, presidenti i Serbisë, Aleksandër Vuçiç kaloi kufirin dhe u fut në Kosovë, përmes pikës kufitare në Bërnjak që ndodhet në komunën veriore të Zubin Potokut.
Eskorta e Vuçiç po sigurohet nga Policia e Kosovës, e cila, sipas njoftimeve zyrtare, ka koordinim edhe me KFOR-in dhe EULEX-in.
Vizita e presidentit serb në Kosovë ishte në pikëpyetje për faktin se autoritetet e Kosovës, fillimisht i kishin lejuar atij vizitën në pjesën veriore, por jo edhe realizimin e axhendës për vizitë te Liqeni i Ujmanit (Gazivodës).
Por, siç kanë deklaruar zyrtarët në Qeverinë e Kosovës, vizita te Liqeni i Ujmanit ishte lejuar pas trysnisë së Bashkimit Evropian, pasi të premten, Vuçiç në shenjë proteste, kishte refuzuar ta takonte presidentin e Kosovës,
Hashim Thaçi në kuadër të dialogut politik ndërmjet Kosovës dhe Serbisë në Bruksel. Liqeni i Ujmanit, nga Serbia dhe presidenti Vuçiç po cilësohen si burim dhe pasuri ekonomike serbe, çka kundërshtohet ashpër nga autoritetet në Prishtinë.